除罩後可以做咩？可以安心掃街！新鮮出爐嘅麵包、蛋撻、熱辣辣小吃，統統可以即買即食！呢間酥妃皇后以酥皮蛋撻作主打，撻底將酥皮摺疊至 368 層！
一咬開層層好似紙片咁薄酥化無比，更有唔少酥皮碎片跌到手上身上，難得係食落口感唔會太油膩，而且撻底仍能保持脆身質感，以酥皮蛋撻嚟講甚有水準！
除咗原味蛋撻 ($12) 仲有好多個款式，鮮奶撻 ($14)、葡撻 ($17)，層次跟原味蛋撻一樣咁豐富！另有十數款藏有內餡嘅酥皮撻，撻底同樣係酥皮但就比較薄身。
軟心系列有抹茶、咖啡、榴蓮、奶皇等口味，麻糬系列有黑糖、紫糬，仲有放滿餡料嘅系列 ($22/件)，朱古力百香果酥撻有鮮甜嘅百香果醬，焦糖果仁酥撻埋滿雜錦堅果。
店內另有丹麥吐司、蛋卷、酥皮芝士蛋糕等其他產品，即場食完酥皮蛋撻，其他甜品就可以帶返屋企慢慢歎！
地址：九龍城候王道 24 號/上環蘇杭街 2-24 號啟豐大廈地庫 5 號
