Café 小店熱潮還未減退！喺尖沙咀人流暢旺嘅嘉連威老道，剛剛有一間咖啡小店易手開業，年輕嘅店主兼咖啡師將小店命名為 Triangle。
咖啡當然係 café 嘅重要元素，手沖咖啡以外，奶啡嘅拉花圖案十分精細，小店同時供應單一產地嘅可可，一共三款可可豆包括 Peru Palo Blanco 75%、Tanzania 75% 及 Peru 50%，調成朱古力奶或 Mocha，各有風味。
食物方面有自家製嘅甜品，比較少見嘅款式有「米布甸」（$38），將米粒浸一小時，再以牛奶、肉桂等煮製，有幽淡香料味道，看起嚟細細杯但食落都幾飽肚。「Daily’s Cake」（$42）當日有原味及伯爵茶味嘅巴斯克芝士蛋糕，伯爵茶味嘅茶味香郁。
鹹食也有供應，早上有牛角包、肉桂卷等，11時後則有意粉。宮保雞丁、軟殻蟹蟹肉等意粉配搭均十分香口，另有炸野菌、南乳炸雞翼等香口小吃，以小店嚟講食物選擇頗多。
地址：尖沙咀嘉連威老道 41C A2 地下
營業時間：8am-6pm
