獲《東京米芝蓮指南》推介、2022 年入選「全球最佳薄餅」位列全球第 16 名及日本之冠嘅日本 Pizza 店「The Pizza Bar on 38th」，於今日起至 2 月 26 日期間於香港置地文華東方酒店舉辦限定餐廳！
將酒店嘅 private dining room 重新打造，築起模仿本店嘅 Bar 枱餐桌及 pizza 焗爐，而該店嘅行政總廚 Daniele Cason 與團隊一同來港，每日駐店親身製作 Pizza。
究竟此店嘅 Pizza 有咩咁特別？用料與食譜當然講究，堅持選用意大利有機麵粉，以 1 克酵母與 80% 水份嘅比例將麵糰發酵 48 小時，餅底焗起香脆乾爽卻有煙韌度，批邊輕盈鬆脆。
至於 Pizza 口味，除咗地道意大利食材，亦配搭多款高質日式材料，像日本北海道新鮮山菜、皇帝蟹及海膽、愛媛縣士多啤梨等，分別製作出鹹或甜味嘅 pizza。
另一款日本店最受歡迎嘅款式，係像三文治嘅 Pizzino，於兩片大薄餅底上鋪滿不同嘅芝士及黑橄欖焗至融化後夾起兩片，撒上芝士碎再焗，然後加上香蔥及黑松露，芝士融化與餅底脆卜卜質感，更有濃郁香氣。
各位 Pizza 控係咪好想試呢，香港 pop-up 店雖然今日才正式開始，但經已滿座，如果想試就要 book 返日本店喇。本身位於東京文華東方酒店內嘅本店，位置也有十分有限，想試就要提早預訂喇！
