屋邨麵包店都可以帶嚟驚喜！位於牛頭角樂華北村嘅森林麵包，就將其人氣港式曲奇皮蛋撻巨大化，變成 15cm 大嘅原個蛋糕！
日常售賣嘅正常尺吋蛋撻每日賣出數百個，由有多年港式麵包烘焙經驗嘅老師傅製作，搓製牛油撻底手勢純熟而且每件十分均勻，並用上日本麵粉、紐西蘭牛油等優質材料。焗起嘅蛋糕外層香脆，而團隊不斷改良配方，蛋漿甜度比傳統較低，時常可見街坊排隊等候蛋撻出爐。
主理人早就想推出巨大化蛋撻蛋糕，但一直未找到合適嘅撻模，直至早前到日本才終於找到夠高身嘅大個撻模，可以做到適合嘅高度比例。而巨大化嘅蛋撻內餡加入黑白奶及法國淡忌廉，令凍食嘅蛋撻更為軟滑，卻依然有濃郁嘅奶香及蛋香味。面層則以焦糖手法炮製，多一層焦香脆口嘅質感。這個「巨型懷舊焦糖蛋撻」（$238），足夠 6–8 人享用。
另一個巨大版嘅舊港式口味係「巨型黃金菠蘿蛋糕」（$238），同樣係 15cm 大並足夠 6 – 8 人分享，靈感則來以港式經典西餅菠蘿蛋糕，以磅蛋糕作基調，於蛋糕底之中加入菠蘿蓉，更加香甜滋潤，面層鋪滿片片烤過焦香嘅菠蘿肉，香甜吸引。
這個農曆新年與家人團年及慶賀新年嘅聚會，以港式及懷舊滋味嘅蛋糕作結最好不過。
地址：牛頭角樂華北邨商場 111 號
營業時間：8am – 9pm
電話：6365 6471
