2013年已喺元朗開設嘅嘉兵衛去年結業令唔少元朗人大嘆可惜，踏入新一年重開絕對係區內人嘅喜訊！
此店由一對夫婦經營，先生為日本人而太太則是香港人，當年開業瞬間即成為元朗區評價極高嘅餐廳，全因日籍大廚一絲不苟嘅心機製作，堅持親自選購材料、預備食材、煮製各個程序，調製出真材實料嘅家庭菜。
光是定食那豚肉麵豉湯已叫人驚喜不已，以脢頭肉以及大量蔬菜熬煮兩個半小時，每日新鮮製作，每一碗均有大件又軟腍嘅豬肉。見微知著，連一碗湯品也花上如此心機、誠意，其他菜式又怎會馬虎？
新店嘅廚房比以往多了空間，添置了專為烤魚而設嘅爐具，因此新增了多款魚類定食。「塩燒花魚定食」（$188）用上大條嘅花魚 (atka mackerel) 開邊塩燒，肉質豐腴又滿有魚油香，另有吉列池魚、塩燒油甘魚鮫、銀鱈魚西京燒、極上浦燒鰻魚等。
除咗魚類定食，以往最受歡迎嘅「黑豚生薑燒定食」（$184）仍有供應，大大片嘅黑豚肉用肉眼部位，而醬汁必須以新薑調製才不會過於辛辣。如果夜市定食，更會將白飯改成有味飯，混以雞肉碎、牛蒡、冬菇及紅蘿蔔，十分足料。
另有多款小食值得一試，「薄切蔥花塩燒牛舌」（$79）也是新增菜式，牛舌以椰菜、京蔥、蔥頭等蔬菜，以慢火燜煮 3 小時以上，軟腍無比，每日限量供應。「八爪鱆魚丸燒」（$54）自家製作嘅粉漿，外面做得香脆而內裏軟糯。而玉子燒也分別有關東及關西兩種風味，關西風味略帶鹹味。
地址：元朗馬田路38號怡豐花園地下12號舖
電話：2343 2023
營業時間：11:30am – 2:30pm、6pm – 10pm
