位於 M+ 嘅 CURATOR Creative Café 獨家推出草間彌生環保杯套，只須惠顧 $88 嘅藝術打印咖啡即可免費換領，作為草間彌生粉絲必定要收藏！
環保杯套有經典嘅黃黑色波點圖，而且可調較圓圈闊度，適合不同大小嘅咖啡杯，即使不是草間彌生忠粉，也可以玩玩藝術打印咖啡。客人可即場將自己嘅圖片傳送畀店員，咖啡店用獨有嘅黃豆打印機將圖片放到咖啡或朱古力上，絕對滿足到打卡嘅慾望。畀個小小嘅 tips 大家，揀選圖案可選較鮮豔嘅色彩，而且留意會以裁成圓形，鮮黃嘅草間彌生圖十分突出！
除咗環保杯套及藝術打印咖啡，Café 亦推出一系列草間彌生主題嘅美食，包括「南瓜蟹肉湯」（$58），將草間彌生標誌性嘅藝術品變成暖笠笠湯品，濃厚嘅南瓜湯之中加入蟹肉，更突顯鮮味。
小食類有「鹿の子糯米炸串」（$22），佈滿波點嘅造型嘅丸子串，其實係糯米球內包裹着麥提莎，而面層沾滿彩色米通。
「抹茶紅豆慕絲蛋糕」（$65）靈感也取自草間彌生作品，黃色外層飾以朱古力片重塑波點圖案，放一小棵聖誕樹更有節慶氣氛，切開小蛋糕其實係抹茶紅豆嘅層次。
喺草間彌生系列以外，咖啡店亦有新品同期推出，包括立體聖誕熊造型嘅「朱古力榛子脆脆慕絲蛋糕」、「鮮果忌廉三文治」等。
地址：西九文化區M+ Museum
營業時間：星期一至四 10am-6pm、星期五至日及公眾假期 10am-8pm
