銅鑼灣最新開張嘅燒肉餐廳「焰」，主打席前燒肉，客人自己唔洗郁手，師傅喺你面前幫你逐道菜燒。餐廳大玩火焰元素作主題 gimmick十足，全開放式吧檯設計，吧檯特設的霧火裝置，極為搶眼，以為真係有熊熊火光，未開始食都已經氣氛up！
呢個咁過癮嘅霧火裝置，仲可以變七彩色，店員會喺上不同菜式時將燈光改變，淨係呢樣拎嚟打卡影相，都夠晒呃like又霸氣。
講返食物，餐廳主打套餐午餐/$380起、晚餐/$780起，分別供應兩款套餐，即使係最高價位嘅晚餐Set B，性價比都好高，13道菜超豐富，有前菜、刺身、鮑魚凍餅、鵝肝茶碗蒸等。
燒肉當然係戲肉部分，用嘅係岩手縣黑毛和牛。日本東北部盛產威士忌，當地牧場興會用威士忌粕、澱粉等混入飼料，所以又有威士忌牛之稱，和牛食起嚟脂香味特別濃郁。
第一個炭薰牛舌好有驚喜，牛舌表面輕炙後，再喺表面放上備長炭，用玻璃罩蓋住奉上，牛舌入口爽滑，油香同炭火香互相交錯。
其他燒肉菜式都做得出色，好似紫蘇二重燒牛肉卷、壽喜汁和牛肉眼薄燒等。鍾情蒜味嘅朋友，見到炭燒和牛柳粒應該會好開心，是關佢係配咗燒原球蒜頭、炸蒜片再加日本玉子鹽漬，好食！
燒肉過後，會上飯或者麵，二揀一月見吉列和牛他他飯堡同梅子冷素麵，自問擦得就揀前者，用上日本夢美人米飯，配天婦羅碎、洋蔥、和牛他他同日本蛋黃，食完基本上都飽到上心口。最後上埋甜品，成餐都好玩又滿足！
地址：銅鑼灣駱克道 487 – 489 號駱克駅 18 樓
營業時間：12pm-3pm; 6pm-10:30pm
