前身係大埔官立中學嘅大埔藝術中心，主力舉辦各式創意藝術活動，最新有主打手工意粉、調酒嘅餐廳Pentola進駐，15號起先正式開業，想食到高質西餐嘅大埔友就有口福啦！
由於藝術中心前身係中學，未嚟過嘅朋友入到嚟都可能有啲一頭霧水，唔同單位以前其實都係班房，熟悉嘅走廊頗有親切感，只要搵到個好似Photo booth嘅物體，拉開布簾正是餐廳本體。
餐廳用上紅磚作設計主調，配合搶眼芥末黃座位，空間感十足，夠晒寬闊。食物主打手工意粉，選用意大利麵粉同本地九龍麵粉廠麵粉製成麵糰，做出嚟嘅意粉彈牙充滿口感。
龍蝦迷必食新鮮波士頓龍蝦意粉/$228，足半隻龍蝦配上大大碟意粉，用車厘茄、羅勒煮成嘅醬汁清酸開胃。比較得意有伯爵茶胡椒慢煮牛面頰特寬麵/$188，手工特寬麵充滿咬口，灑上粒粒紅胡椒，食到淡淡茶香。
小食推介脆炸魷魚圈配他他醬/$88，魷魚圈外脆內彈牙，加埋開胃他他醬，令人食唔停口。另外餐牌上特別有幾款青口/$118起，可以揀羅勒番茄醬、檸檬牛油汁或者椰香秘鰻辣椒汁，青口煮得夠嫩滑，全部都配上酸種多士。
餐廳另一主打就係創意調酒，可以點返杯好睇又好飲嘅Lemon Meringue Pie，以檸檬做主調 夠晒清新，面層仲有輕炙過嘅蛋白霜，除咗調酒，另外都有咖啡供應。
大埔同區一向較少做得精緻嘅嘅西餐，難得有新店進駐，仲要有酒飲。大埔友想食得好啲，又唔想出得遠，而家就多個好去處啦！
地址：大埔安邦路12號大埔藝術中心地下G01-02
營業時間：11月15日開業
