凍冰冰要食羊腩暖身！呢間街坊麵包店新推出嘅羊腩包來得合時，布甸包熱潮仍未減退兼各家麵包店不斷創新。紅心麵包西餅就將布甸包變成鹹香滋味，與米子食堂合作，將其出品嘅枝竹羊腩煲變成羊腩包 ($38)！
喺圓碌碌嘅麵包內倒入經炆煮嘅羊腩，細心地將羊肉切成較細小嘅肉粒仲有枝竹、冬菇等配料。外層香脆嘅麵包吸收咗羊腩煲醬汁，啖啖肉又香郁，一人分量嚟講都幾飽肚，留意返羊腩包由於要逐少新鮮出爐，所以只限星期一至五 12-2pm 供應。
鍾情甜味布甸包嘅話，此店原味嘅布甸包（$13）也做得有水準，布甸餡料夠多亦十分軟滑！
另一震驚之作係流心蛋糕，有綠茶、朱古力等口味，切開蛋糕已開始流出中間嘅忌廉。店家特意用有深度嘅碟子形蛋糕墊，唔怕流到周圍都係，戚風蛋糕底比預想之中更加鬆軟，滿滿空氣感而且甜度算低。蛋糕外層嘅忌廉也不算甜，將蛋糕蘸點流心嘅醬汁吃，更有濕潤質感，絕對係高質。
走到店中仔細看看麵包櫃，喺新鮮出爐嘅蛋撻旁，仲有可愛的骰嘅迷仔葡撻。雖然 size 迷仔但酥皮嘅層次清晰可見，一口吃下去鬆脆可口！
其他必試出品仲有近期再成潮流嘅麻糬波波，有菠蘿包脆皮、伯爵茶及芝士等口味，軟韌質感卻十分輕盈。麵包店現有 4 間分店，除咗佐敦店，其餘 3 間都喺街坊住宅區，小店還不時推出創意產品，附近嘅街坊居民真有口福啊！
地址：佐敦白加士街 98 號金威廣場地下 2 及 3 號舖/青衣長康邨二期商場地下 103 號舖/青衣長亨商場 1 樓 102-103號/屯門兆麟商場地下 11 號舖
