估唔到喺銅鑼灣正中心鬧市可以搵到個咁寧靜嘅地方飲咖啡！新開嘅café小店 fuwafuwa 就喺 SOGO 軒尼詩道旁邊嘅 Radio City 地下，面向軒尼詩道但地鋪隱身於大廈內，外邊係熙來攘往嘅行人街道，但喺小店內卻有一種舒服幽靜嘅氣氛。
Café 名字 fuwafuwa 喺日文用於形式軟綿綿、輕飄飄嘅感覺，店主就係希望做到一種放鬆休閒嘅氛圍，由 logo、布簾、牆身裝飾品等均散發着日式嘅品味。與店主談談天會發現更多驚喜，很多細節都花上心思甚至不惜工本，像咖啡吧枱、桌枱、裝飾櫃，均由本地手造木工製作所「第二春」度身製造。
又簡單如咖啡卡，用上有質感嘅牛奶盒再造紙，於日本搜羅四色墨硯，每個印仔嘅顏色都不一樣，充滿個人化嘅元素。
飲品除咗機沖及手沖嘅咖啡，值得留意 matcha latte ($60)，選用古川製茶小綠(薄茶)，由日本製茶師古川先生精心調製比例，將早綠及朝日兩種茶葉混合，入口溫和甘順更有 umami 鮮味。為保持抹茶最佳風味，每次有客人 order 才會即席沖調抹茶，與鮮奶混合調製成 latte，依然滿溢抹茶嘅鮮味。
小店另有蛋糕供應，款式不定期轉換。現時供應嘅士多啤梨忌廉卷，以鬆軟海棉蛋糕包裹滿滿嘅軟滑忌廉，仲有新鮮士多啤梨，十分香甜。朱古力味則加上榛子，每一口忌廉均有堅果香。
地址：銅鑼灣軒尼詩道505 號 Radio City 地下
營業時間：平日 9am – 6pm、週末及公眾假期12pm-10pm
