凍凍哋嘅天氣，食返碗湯麵就最啱！呢間位於大角咀嘅馬來椰爺，主打馬來風味喇沙，自家秘製炒醬用上多款材款，爆炒熬煮超過9小時，做出嚟嘅喇沙湯香濃富層次。椰漿份量恰到好處，唔係一般係街食到過重椰奶味而變得失真，麵底只做摻摻，即係一半油麵加一半米粉。
必食原隻炸軟殼蟹蜆肉秘傳喇沙/$118，大大隻軟殼蟹啖啖肉，配以醬油炒香嘅粒粒蜆肉，滋味滿足，食得辣可以揀檳城白咖喱湯。推介黑醬肥牛滷燉金沙骨白咖喱湯麵/$82，每碗白咖喱麵都附有一匙參巴醬，白咖喱湯相對清爽，但加咗參巴醬，就會變得越重口味同越辣。除咗呢兩款湯底，另外仲有咖喱喇沙同香草椰奶湯。
星馬美食當然唔少得咖央多士，飽一飽都要點鮮香蕉流心斑蘭咖央多士/$38，烘脆多士夾著手工斑蘭椰香咖央醬，同暖暖嘅香蕉蓉味道超夾，好好食！流心狀嘅咖央醬食嘅時候要小心，唔係就流到成手都係㗎啦！
地址：大角咀櫸樹街62號富多來商場2期地下14號舖
營業時間：逢星期二至五及日12pm-3pm; 6pm-8:30pm
