人氣網店喺堅尼地城開設烘焙工作坊，可以跟皇后餅店、嘉多娜餅店師傅學做餅！已開店兩年以鳳梨酥作主打嘅 Boulangerie Alice，以融合土鳳酥及金鑽鳳梨嘅手工鳳梨酥打響名堂，用上日本麵粉、三溫糖等高質材料，果然係每一顆也富有牛油香、質感鬆脆，而餡料酸甜度適中，難怪高峰期一週賣過千。
店主 Alice 熱愛製作麵包及烘培品，更希望將烘焙技巧、傳統糕餅與更多人分享，因此喺堅尼地城開設 Alice Baking Studio。全新工作坊特別聯同老字號餅店嘅師傅一同授教，包括擅長懷舊西餅、港式曲奇、曾任職皇后餅店嘅豪師傅，將會授教製作黃梅果醬曲奇、腰果曲奇等，而嘉多娜餅店創辦人則會授教港式芒果忌廉蛋糕及紙包蛋糕。
工作坊內亦有售 Alice 嘅手工鳳梨酥，仲有另一款得意之作法式果仁曲奇，用上杏仁、腰果、夏威夷果仁 3 種堅果，保留大大粒嘅香脆口感。面層撒上法國鹽之花海鹽，天然嘅鹹香味帶來恰到好處嘅平衡。
此外店內仲有多款 Alice 自日本搜羅嘅麵包飾物，耳環、髮夾、月曆、布料等，亦將會出售日本烘焙食材，各位麵包控不可錯過啊！
地址：堅尼地城士美菲路83 號地下 2&3 號舖
電話：9614 0261
