太子新開嘅 Chill Pill 供應不一樣嘅菜式，有一系列邪惡嘅款式，同時有清新健康嘅日式定食！原來係負責人刻意打造邪惡與健康並重嘅餐牌，知道香港人去 café 就係忍唔住想食薯條、班戟、芝士、甜品等，但一班朋友或男女朋友之間總會有人想食得清淡，所以同時供應可自由選擇主食、主菜、配菜嘅日式定食，最難得係大部分醬料、食材都係自家製作，打卡之餘味道也有水準。
先介紹邪惡系列，「Chill多茜牛肉漢堡配芫茜Shake Shake薯條」（$148），薯條控及芫荽黨要出尖叫了，薯條以紙袋盛着，倒入附上嘅芫荽粉，Shake shake shake 將粉末搖勻，一打開袋香噴噴。芫荽粉係自家將芫荽梗磨碎，味道十分突出，而漢堡包則有大堆嘅新鮮芫荽，以及自家煮製嘅芫荽醬，牛肉嘅肥瘦比例係 café 與供應商特別調製，香郁多汁。
「芝士通心粉」蟹黃（$98）、焗芝士波士頓龍蝦（$176），通心粉吸滿芝士及忌廉汁，面層有焗至脆身嘅口感，加埋龍蝦肉啖啖滿足。「唐揚炸雞楓糖漿班戟」（$108）嘅班戟鬆軟而厚度剛好，倒入楓糖漿班戟吸收滿滿甜味，切開溏心蛋仲有蛋黃流出，炸雞則保持到外脆內多汁。
「宇治抹茶雞蛋仔(牛角窩夫)」（$78）將牛角包用雞蛋仔機壓成形，依然保留牛角包嘅牛油香及層層酥脆，配上抹茶雪糕、紅豆麻糬、抹茶醬，另有柚子蜜糖味。
想吃得健康一點就有自家 mix & match 嘅 Matchy Combo ($118, 部分配料須另加價錢)。
自選 Carbs 一種：可選日本珍珠米、木魚湯烏冬、紫蘇醬油醋蕎麥麵
主類可選兩種：味噌比目魚、炙燒油甘魚、自家製免治雞卷、和牛粒、慢煮叉燒、自家手打嘅炸蝦墨魚波波等
蔬菜或蛋類：山葵山藥漬、香草烤南瓜、醬油秋葵漬、米醋蓮藕漬、明太子日式蛋卷、三文魚子滑蛋。
飲品都有邪惡與清新之選，「花生醬奶蓋鮮奶咖啡」（$50）將花生醬打成奶蓋，雖然聽落好邪惡但味道上不會太甜，另有顏色吸睛嘅「椰e椰 OR OR!」（$45），見到個名就知係椰子味，仲有菠蘿汁，好似一杯無酒精嘅 pinla colada。
Café 有一個大窗戶，旁邊嘅沙發椅及原木咖啡枱坐得好舒服，店內嘅小擺設也覺有覺，坐喺到的確係幾 chill 啊。
地址：太子洗衣街 167 號地下
營業時間：11am – 9:30pm
