像花卷一般嘅精緻造型，又點會估到佢係乾炒牛河？仲有真菠蘿嘅「菠蘿油」、像墨西哥卷嘅公司三文治等，賣相係極花心思嘅 café 食物，靈感、食材卻是茶餐廳嘅經典。如此有創意嘅菜式嚟自觀塘嘅 coffee or Tea，將冰室及茶記食物變得年輕時尚。
「鴛鴦蛋蛋蛋治」（$78），一個蛋治內用上煎、焗、蒸、煮四種方式去炮製雞蛋，中間厚厚嘅雙色餡係玉子燒及焗蛋白，再於薄脆多上淋上以 65 度低溫慢煮嘅蛋漿，以及先蒸再焗香嘅鹹蛋黃，使用日本蛋，味道香郁又有多種口感。
「鐵板牛柳河粉」（$118）以粉皮取代河粉，跟日本蛋皮、意大利青瓜片一同捲起，淋上中式燒汁，底層嘅銀芽、洋蔥等吸盡醬汁，在鐵板上傳來香噴噴嘅味道。
「脆脆公司三文治」（$78）以米紙包着腿蛋、煙肉、番茄、車打芝士、水牛芝士，再以腐皮將之包裹着豐富餡料，淋上自家調製嘅醬汁，食晒成份都幾飽肚。
「炒貴刁」（$128）賣相精緻得如 fine dining，其實底層係以芽菜、火腿等製成嘅芙蓉蛋餅，面層以水晶粉及粉皮取代河粉，配以蝦仁及自家製嘅咖喱油，香郁微辣。
「西炒意大利飯」（$128）用原個番茄盛着意大利米形意粉，以煮製 risotto 嘅方法令意粉粒粒飽滿多汁，配搭滑蛋蝦仁，就連黑色嘅黑水欖粉末也花過心思，能將各食材嘅味道提升也給予意式風味。
「菠蘿的海」（$78）將菠蘿油變成甜品，底層係烤至香脆嘅光酥餅，中間夾着厚切嘅菠蘿，面底撒上菠蘿包嘅酥皮，放一片風乾菠蘿及法國牛油，係一個有真菠蘿嘅菠蘿包！
地址：觀塘裕民坊 YM² 1 樓 101 號舖
營業時間：8am – 9pm
電話：2618 1180
